MASAKRE MUAPITINE: 8 DEZEMBRU 1983

Vitima Masakre Muapitine

Iha tinan 1978, baze de apoiu iha foho Matebian totalmente naksobu. Depois baze apoiu naksobu populasaun barak iha foho Matebian tun mai rende hodi hamutuk ho invazór sira iha vila no hosik hela FALINTIL no kuadru FRETILIN nian balun iha ai-laran. Embora populasaun barak mak tun mai vila hodi hamutuk ho funu-maluk invazór sira maibé sira nia espiritu pátriotiku nunka lakon iha sira nia hanoin. Sira ne’ebé tun mai vila servisu ba inimigu maibé iha tempu hanesan mos sira mantein nafatin kontaktu ho FALINTIL sira iha ai-laran hodi oferese material nesesidade baziku nian ba FALINTIL sira. Atu nune’e, FALINTIL sira kontinua sobrevive hodi reziste nafatin hasoru tropa Indonézia iha ai-laran.

Geografikamente Lospalos hanesan municipiu ida ne’ebé luan no iha ai-laran tuan ne’ebé fasil ba gerileiru sira atu halo movimentasaun ba mai no iha tempu hanesan mos sai hanesan fatin ne’ebé iha ai-han sira hanesan maek, nuu, kumbili no ai-han seluk tan ne’ebé FALINTIL sira fasil atu hetan. Tanba ne’e, iha tinan 1978 depois baze apoiu naksobu gerileiru barak mak hosik hela foho Matebian hodi ba akampa no destaka iha foho Pai Tx'au too Legumau no Naunil. Falu Txai (Miguel do Santos) nudar komodante ida ne’ebé mai hosi Lospalos no iha tinan 1978 nia ho kompanhia ida destaka hela iha foho Pai Tx'au. Hahú kedas iha tinan 1979 nia halo kontaktu regular ho populasaun sira iha suku Muapitine. Iha loron 24 fulan Novembru tinan 1983, militár Indonézia nian hahú deskobre katak iha populasaun nain 7 mak mantein konktatu ho gerileiru FALINTIL sira durante tinan haat ona.

Depois deskobre tiha, militár Indonézia hahú kaer kedas populasaun nain hitu (7) hodi lori ba kastigu iha kodim 1629 iha Lospalos. Sira nain hitu (7) ne’e mak: Alarico, José Vicente, Angelo da Costa, Lino Xavier, Alvaro Freitas, Alberto dos Santos no Leonel Oliveira. Sira hotu hetan tortura ne’ebé dezumanu no degradante durante loron 14 iha kodim 1629, hafoin ikus-mai iha loron 6 fulan dezembru sira hosik sai Alarico no José Vicente.

Tuir-mai, iha loron 7 fulan Dezembru komodante hosi komando militár iha Muapitine informa ba populasaun sira katak iha loron 8 fulan dezembru  komunidade sira iha suku Muapitine sei hetan vizita hosi komodante Kodim 1629, Bupati KDH TK II Lautém no komodante KOPASSUS hosi Lospalos. Alende ne’e, komodante mos informa katak populasaun nain lima (5) ne’ebé kastigu iha Kodim 1629 mós sei mai hamutuk ho sira iha loron ne’e. Tanba rona katak sira atu hetan vizita mak populasaun sira prepara no organiza malu atu simu ho tebe-tebe no batuke.

Iha loron 8 fulan-Dezembru, populasaun halo festa hodi simu netik sira ho kontenti tebes. Maibé, infelizmente saida mak akontese? Militár Indonézia nian entrega kilat no tudik ba Timoroan sira liu-liu dadur nain lima (5) sira nia familia atu oho sira nain lima (5) iha labarik, joven no katuas-ferik sira nia oin. Sira nain lima (5) ne’e mak:

1. Angelo da Costa hosi Malahara

2. Alvaro Freitas hosi Muapitine

3. Lino Xavier hosi Pefitu

4. Alberto dos Santos hosi Vailoro no

5. Lionel Oliveira hosi Muapitine

Durante Indonézia nia okupasaun masakre akontese iha fatin barak. Sofrementu oin oin ne’ebé difisil atu sura ka imajina no susar tebes atu hateten sai ho liafuan tanba sofrementu hirak ne’e halo Timoroan sira piskolojikamente sente moras no kanek iha sira nia fuan no pensamentu.

Dili, 08 Dezembru 2017

Autor : Timor Ha'u-Nia Rain