LORON FALINTIL-JOVEN NAIN LIMA (5) NE'EBÉ MEHI ULUK TIMOR LESTE NIA UKUN-RASIK AN

Fundador ASDT/FRETILIN

Iha tinan 1960, tempu ne'ebá Timor hanesan rai kolonia ida husi impériu Portugés. Iha dékada ne'ebá, foin-sa'e lubuk oan ida hanesan Mari Alkatiri, José Ramos Horta, Nicolau Lobato, Justino Mota no Francisco Borja da Costa, sira hahú halibur malu hodi halo diskusaun kona-ba anti-koloníal no anti-imperial. Sira hotu iha idade ki'ik momentu ne'ebá. 

Biar nune'e, lori sira nain lima (5) nia hanoin no nia matenek mak ohin-loron ita-nia rain livre husi sistema koloníalismu no imperalismu. Sira-nia naran sei la lakon istória no sei hela metin iha istória husi tinan ba tinan. Obra ukun-rasik an ne'ebé Xanana Gusmão ho timoraon hotu alkansa iha loron 20 fulan-Maiu 2002 hahú hosi sira. Lori sira nain lima (5) mak Xanana Gusmão no timoroan barak sira nia personalidade no naran ilustre tebes iha istória Timor-Leste nian.

Iha dekáda 70, entre joven nain lima (5) ne'ebé mehi uluk Timor-Leste nia ukun an, joven ida ne'ebé hasai uluk liafuan "MAUBERE" iha nia ensaiu "MAUBERE MEU IRMÃO " mak Jose Ramos Horta. Liafuan ne'e maka ikus mai Xanana Gusmão foti hodi hakerek nia poezia "MAUBERIADAS."

Hafoin revolusaun dos cravos iha Portugal, iha loron 25 fulan-Abril 1974, joven lubuk oan ne'e halibur malu iha sidade Dili hodi forma partidu ASDT ne'ebé ikus mai transforma ba FRETILIN iha loron 11 fulan-Setembru 1974. Prinsípiu fundamentál partidu ASDT nian mak liberdade, independénsia, sosializmu, demokrásia, anti-koloníal no anti-imperial. Baze idolojia politíka ASDT-FRETILIN nian maka ukun-rasik an. Prinsípiu no idolojia hirak ne'e mak norteia timoroan barak hodi luta hasoru okupasaun ilegál Indonézia nian durante tinan 24 nia laran no barak mak lakon sira-nia vida. 

Ho argumentu komunizmu no Indonézia nia presaun, inklui mós influénsia funu-malirin (Guerra fria) nian provoka UDT lansa golpe iha Dili iha loron 11 fulan-Agostu 1975. Hafoin golpe mosu, entre joven nain lima (5), joven nain rua Mari Alkatiri no Nicolao Lobato, hamutuk Alarico Fernandes no sira seluk tan harii FALINTIL hodi halo kontra golpe iha loron 20 fulan-Agostu 1975.

Kontra golpe liu-tiha, joven nain lima (5) hamutuk ho membru Comite Central FRETILIN (CCF) nian sira seluk, proklama unilateralmente Timor-Leste nia independénsia iha loron 28 fulan-Novembru 1975. Proklamasaun independénsia akontese tanba tropa Indonézia nian hahú tama ona iha Atabae (Bobonaro) dezde fulan-Outubru. 

Liu-tiha loron rua hafoin proklamasaun unilaterál, Nicolao Lobato fó fiar ba joven nain rua Jóse Ramos Horta no Mari Alkatiri, inklui mós Rogero Lobato ba iha rai-liur hodi halo servisu diplomátika enkuantu joven nain tolu ho membru CCF sira seluk hela iha Timor-Leste.

Hosi foin-sa'e nain lima (5) ne'ebé mehi uluk Timor-Leste nia ukun-rasik an, nain rua mak sei moris hela enkuantu nain tolu sira seluk saran sira-nia moris tomak ba Timor-Leste nia independénsia. Sira nain rua ne'ebé sei moris hela mak Jóse Ramos Horta no Mari Alkatiri. 

Ohin-loron iha era ukun-rasik an, Jose Ramos Horta no Mari Alkatiri tama ona ba idade ferik-katuas nian. Maibé, sira rua nafatin serbisu ba Timor-Leste no nunka sura sira rua nia kolen. Iha parte seluk, timoroan lubuk ida tanba de'it interese pesoál no interese grupu ida nian, sira la respeitu tiha joven sira ne'ebé mehi uluk Timor-Leste nia ukun-rasik an, liu-liu Jóse Ramos Horta no Mari Alkatiri.

Nune'e, mak timoroan barak hanoin dehan referendum 30 Agostu 1999 mak lori Timor-Leste ba hetan obra ukun-rasik an. No sira haluha tiha katak lahó sira nain lima (5) nia mehi no luta naruk ne'ebé lídera husi Xanana Gusmão durante tinan 24 nia laran maka obra ukun-rasik an ne'ebé hetan rekoñesementu internasionál iha loron 20 fulan-Maiu 2002 nunka atu akontese. Hosi sira nain lima (5) nia mehi mak ohin-loron timoroan lubuk ida goza regalia no previlejiu husi ukun-rasik an ida ne'e. Sira hotu ne'ebé goza regalia no previlejiu, barak mak moris di'ak no riku matak.