TIMOR-LESTE NIA ADEZAUN BA ASEAN

Timor-Leste devia tama ona ASEAN, bainhira bazeia ba kritéria proximidade jeográfika. Razaun tanba Timor Leste nia konstelasaun paíz jeografikamente hola parte iha rejiaun sudeste Aziátiku. Biar Timor-Leste seidauk tama ASEAN. Maibé, Timor-Leste ofisializa ona nia vontade politíka, prontidaun no abililidade tomak hodi hatama nia aplikasaun ba ASEAN iha fulan-Marsu 2011 bainhira Indonézia mak asume prezidénsia ASEAN.

Timor-Leste nia adezaun ba ASEAN ne’e pertinente tebes tanba fiar katak ho adezaun ne’e sei lori mudansa signifikativa ba Timor-Leste iha prazu naruk. Aleinde ne'e, ho adezaun ne'e mós sei reforsa integrasaun rejionál no lori mós impaktu pozitivu ba setór polítiku, ekonómiku no sosiál Timor-Leste nian.

Timor-Leste nia plena adezaun ba ASEAN ne’e monu los iha momentu ida ne’ebé ASEAN promove hela "ASEAN economy community", iha ne’ebé movimentasaun bem no servisus, mão de obra no kapitál sirkula livremente iha nasaun membru sira. Ho ida-ne’e, bainhira Timor-Leste sai ona membru ASEAN, timoroan sira sei ba servisu, investe no kompete iha paízes membru ASEAN no mós ema husi paízes membru ASEAN sei mai servisu, investe no kompete iha Timor-Leste sein bareiras.

Problema ne’ebé sai hanesan kestaun sentrál ba Timor-Leste nia adezaun mak tuir mai ne’e:

1. Oinsá politíka kompetetividade nasionál Timor-Leste nian atu kompete ho paízes membru ASEAN sira seluk iha merkadu livre ne’ebé marka ho entrada no saída ema nian livremente no mós liberalizasaun bens, servisus no kapitál iha paízes ASEAN nian? 

2. Dezafius kompetitiva saída mak Timor-Leste sei hasoru em termus politíku, ekonómiku, no rekursu umanu iha ámbitu adezaun Timor-Leste nian ba ASEAN? 

3. Seráke Timor-Leste tenke tama imediata ona ba ASEAN iha tinan 10 nia laran mai ka Timor-Leste presiza adezaun eventuál ka entrada graduál ho períodu tranzitóriu ida bem definidu? 

4. Benefisiu saída mak Timor-Leste sei hetan husi ASEAN no mós benifisiu saída mak ASEAN sei hetan husi Timor-Leste?

Bazeia ba problema sentrál haat (4) iha leten konklui de'it katak Timor-Leste nia adezaun ba ASEAN ne'e asuntu indiskutível. Tanba ne'e, Timor-Leste tenke prepara-an didi'ak molok adere ba ASEAN. Ho nune’e, bainhira Timor-Leste sai ona membru ASEAN karik, labele sai "penonton" ba ASEAN hanesan ema barak hatete. Maibé, Timor-Leste bele sente duni mudansa no dinámika dezenvolvementu ne’ebé ASEAN alkansa.

Rejiaun ASEAN hanesan rejiaun ida ne’ebé nia paízes membru sira karatérizadu ho ekonómia ne’ebé diversus tebes, ho populasaun por volta 600 milloens no produtu doméstiku bruto kombinadu ho folin 2,4 triloens dollar. Ho ida-ne’e mak hahú kedas iha 2015 nia rohan, ASEAN hakarak halo integrasaun ekonomia rejionál ho projetu estabelesementu "ASEAN economy community." 

Objetivu prinsipál hosi " ASEAN economy community" mak atu kria rejiaun ida ne’ebé estavél, prosperu no paízes membru sira tenke iha politika kompetitiva ne’ebé aas. Ne'e signifika katak paizes membru sira sei iha fluxu livre bens, servisu, investimentu no kapitais, dezemvovementu ekonomiku ne’ebe ekuitativu no redusaun pobreza ho diverjénsia sira sosiu-ekonómika iha 2020.

Timor-Leste nia ekonomia agora daudaun sei karatériza hanesan "the economy soft scale" ka "fragile economy." Signifika katak Timor-Leste sei konsidira hanesan paíz kiak em termus ekonómiku. Biar nune'e, Timor-Leste bele oferese vantajem komparativa ba nasaun membru ASEAN sira. Iha área pertinente 3 ne'ebé Timor-Leste bele kapitaliza hodi oferese ba ASEAN mak hanesan tuir mai ne’e: 

1. Timor-Leste bele oferese ba ASEAN esperensia paz no rekonsilasaun entre Timor-Leste ho Indonézia ne’ebé sai hanesan modelu ezemplar iha mundu internasionál nia matan. 

2. Timor leste bele oferese ba nasaun membru ASEAN mekanizmu jestaun rekursu naturais ne'ebé Timor-Leste hetan rekoñesementu husi EITI nu'udar paíz primeiru iha Azia no terseiru iha mundu ne'ebé jere nia rekursu naturais sira ho forma apropriadu.

3. Timor-Leste bele oferese ba nasaun membru ASEAN sira, Timor-Leste nia "constructive international engagement" iha organizasaun g7+ ne’ebé rekoñese mós iha nível internasionál.

Iha sorin seluk, atu hasae politíka kompetitividade nasionál Timor-Leste nian mak setór hotu hotu iha Timor Leste liuliu setór privadu ka setór emprezarial tenke hasae ninia kapasidade kompetitiva hodi garante kualidade mão de obra tuir pradraun rejionais ASEAN nian. Tanba ne’e, setór emprezariál hotu-hotu tenke esforsu-an no governu Timor-Leste tenke aposta makaas iha formasaun kuadrus iha nível avansadu no nível superior hodi fo dalan ba kriasaun emprezariais, estabelese ligasaun meius ekonómikus emprezariais no hasae kualidade empregabilidade ba Timor- Leste nia rekursu sira hodi kompete ho nasaun membru ASEAN sira.

Dezafius kompetitiva ne’ebé Timor-Leste hasoru em termus rekursu umanu mak Timor-Leste agora sei menus rekursu ne’ebé kapasitadu em termus kapasidade tekniku profisionál no lideransa. Tan ne’e, trabalho de casa ba Timor-Leste mak governu presiza aposta no investe makaas liután iha setór edukasaun nune’e lori avansu ba formasaun rekursu umanu hodi fasilita Timor-Leste bele kompete no responde ba ASEAN nia ezijénsia.

Ikus-liu, molok adere ba ASEAN Timor-Leste mós tenke hadia nia infraestrutura bázika, hametin estadu de direitu demokrátiku no selu-seluk tan.

Autór: Timor Ha'u Nia Rain