POVU KBIIT LAEK HEIN ORAS BA ORAS ATU HETAN BEE MOOS

Orsamentu Jerál Estadu (OJE) kada tinan billoens ida resin. Maibé, povu kbiit laek sira atu kuru bee de'it tenke la'o dook no hein malu oras ba oras mak hetan bee moos. Kuitadu osan sira ne'e ba hotu ne'ebé mak povu nafatin halerik ba bee moos. Seraké alokasaun orsamentu ba bee moos mak laiha? Se iha tambasà mak povu halerik nafatin bee moos?

Deputadu sira realiza plenária ba diskusaun sosa prado ba sira-nia an iha. Maibé, plenária ba diskusaun asuntu bee moos ba povu kiik sira laiha. Pior liután mak deputadu sira tuur iha Uma Fukun Parlamentu Nasionál kestiona de'it asuntu sosa prado. Enkuantu asuntu bee moos ba povu kiik sira, deputadu sira tuur nonook no halo finje la hatene. Sá reprezentante povu mak hanesan ne'e?

CNRT ho nia aliadu sira ukun besik tinan 12 ona. Maibé, rezolve de'it bee moos ba povu ki'ak sira la konsege. Hakarak ukun maibé kapasidade atu rezolve bee moos ba povu kiik sira mukit loos. CNRT ho nia aliadu sira moen laiha, bosokten, mafiozu, astutu, ipókrita, egoísta no ignorante.

Kuitadu ba governu AMP, gaba-sola an dehan atu dada kadoras mina no gás mai Timor-Leste. Maibé, realidade dada de'it bee moos ba povu kiik sira la konsege. AMP nia responsabilidade atu kumpri promesa sira ba povu kiik sira ne'e iha ne'ebé? AMP hatene de'it halo retórika mamuk maibé la hatudu rezultadu. Tamba ne'e, promesa bee moos ba povu kiik sira hela naran de'it.

Ukun-na'in sira só iha kapasidade atu hamosu impase politíka. Enkuantu problema bee moos ukun-na'in sira laiha kapasidade atu rezolve. Nune'e mós, ukun-na'in sira hatene de'it hadau malu ukun maibé ukun la hatene, tamba ne'e povu nafatin halerik ba bee moos. La hatene to'o bainhira loos mak ukun-na'in sira bele rezolve problema bee moos?

Ukun-rasik-an folin laek bainhira ukun-na'in ho grupu elite kiikoan ida mak goza. Enkuantu povu kiik sira nafatin terus no sofre ba bee moos. Ukun-na'in sira tenke sensível uitoan ba povu kiik sira-nia terus no sofrimentus. Labele sensível de'it ba imi-nia kabun no imi-nia bikan laran. Ukun-an tinan 17 ona, povu la merese atu moris terus no sofre nafatin. Povu merese moris dignu hanesan mós imi ukun--na'in sira.

Autór: Timor Ha'u-Nia Rain