TODAN HOTU TULA LOOS BA SÉ BAINHIRA ALKATIRI LAIHA ONA?

Mari Alkatiri

Karik ita hateke ba kotuk uitoan iha tinan 2002, bainhira Dr. Mari lidera I governu konstitusionál, Orsamentu Jerál Estadu nian (OJE) tinan 2002-2003 mak $ 68 millaun dollar. Osan $ 68 millaun ne’e uitoan tebes bainhira ita kompara ho Orsamentu Jerál Estadu nian (OJE) durante CNRT nia ukun iha tinan sanulu (10) ikus-ne’e nia laran. Biar osan uitoan tebes, maibé Dr. Mari sempre jere osan $ 68 millaun ho di’ak, transparente no prudente. Duadores internasionál ne’ebé tempu ne’ebá fó apoiu finanseiru, admira tebes ho Dr. Mari nia jestaun ba osan $ 68 millaun dollar.

Irónika tebes mak iha tinan 2002, kuandu Dr. Mari xefia I governu, ema barak akuza no kondena makaas governu ne’ebé Dr. Mari Alkatiri lídera nu’udar governu koruptu no inkompetensia, tanba de’it osan $ 68 millaun la konsege rezolve povu kbi’it laek sira-nia susar no terus. Montante osan $ 68 millaun uitoan tebes kuandu kompara ho Maun Boot Xanana Gusmao nia ukun, iha ne’ebé osan kada tinan nia montante billoens ida resin. Maibé, povu nafatin halerik ba bee moos, hela uma la di'ak, dook hosi sentru saúde, menus ai-han, oan sira la eskola, la asesu ba eletrisidade no susar ho terus seluk tan.

Aleinde ne'e, iha tinan sanulu (10) ikus ne’e nia laran, governu ne’ebé lidera hosi Maun Boot Xanana Gusmao, ukun ho montante Orsamentu Jerál Estadu nian (OJE) boot tebe-tebes no jestaun ba Orsamentu Jerál Estadu (OJE) ho nia tendénsia atu hamahar de’it ukun-na’in ho nia elite sira-nia karteira. Ukun-na'in ho grupu elite kiikoan ida mak riku matak. Maski nune’e, laiha ema ida mak kritíka no akuza Xanana Gusmao tanba predikadu "Maun Boot". Ema sempre fó aplauzu no felisita, maski Maun Boot Xanana Gusmao nia ukun nakunu ho pratíka korupsaun, fakar osan arbiru no inefisiensia. Enkuantu Dr. Mari ukun jestaun bele di’ak mós, ema sempre insulta, kritíka, difama no akuza ho lia falsu oi-oin.

Liu-tiha ne’e, iha tinan 2014 Dr. Mari simu fali knaar lídera RAEOA no ZEESM. Durante tinan haat (4) Dr. Mari nia lideransa hatudu rezultadu dezenvolvimentu ida ne’ebé impresionante tebes. Rezultadu dezenvolvimentu ida ne'ebé lori transformasaun dramátika iha Óe-Cusse.  Tranformasaun hirak ne'e hatudu katak Dr. Mari ema ida ne’ebé matenek, neon-na’in, kompetente no firme iha nia lideransa. Maski nune’e, tanba diferensa politíka ema balun ladún rekoñese rezultadu dezenvolvementu iha Óe-Cusse. Sira  nafatin  insulta, kritíka, difama no akuza ho lia falsu oi-oin.

Ohin-loron Dr. Mari sei moris, todan hotu tula ba Dr. Mari.  La hatene, loron ida bainhira Dr. Mari laiha tiha, todan sira ne'e atu tula fali ba sé loos?

Autór: Timor Ha’u-Nia Rain