LIAN TETUN NIA ISTÓRIA

Mapa Tetun Prasa

Lian Tetun nia hun halo parte família austronézia ka malaio-polinézia. Lian austronézia ka malaio-polinézia mak lian sira ne'ebé namkari iha illa aziátiku no pasífika. Oras-ne'e, lian Tetun nu'udar lingua franka. Lingua franka dehan katak lian ne'ebé ema ko'alia hodi komunika ba malu, bainhira sira-nia lian la hanesan. Nu'udar ezemplu, bainhira ema Makasae ho ema Mambae hasoru malu sira ko'alia Tetun.

Lian Tetun sai hanesan lingua franka iha Timor, tanba tinan 400 liubá molok Portugal tama iha Timor, iha liurai Tetun-Terik rua mak ukun Timor. Ida mak liurai Wehali ukun iha parte Timor-Lorosae ho tan distritu Belu iha parte Loromonu. Sentru ba liurai Wehali nian mak iha Betun, iha rai Belu. Ida seluk mak liurai Luca ukun iha Viqueque. Liurai Tetun-Terik rua ne'e la ukun to'o iha Lospalos. Nune'e, iha Lospalos tinan 400 liubá ema la ko'alia Tetun.

Liurai boot rua ne'e ko'alia Tetun-Terik, tan ne'e reinu sira mós tenke aprende Tetun-Terik hodi komunika ho liurai boot ho nia manu-ain sira. Ho liurai boot rua nia ukun mak rai hotu-hotu ne'ebé sira ukun, iha ema balu ko'alia Tetun-Terik. Oras-ne'e, Tetun-Terik ko'alia iha Soibada, Natarbora, Lakuluta, Suai, Belu no fatin seluk tan.

Liu tiha ne'e, bainhira Portugal ukun fali Timor, timoroan hotu aprende Portugés. Iha tinan 1769, bainhira Portugal muda nia kapitál mai iha Dili. Timoroan tomak ne'ebé hela iha Dili, sira ko'alia Portugés no Tetun ba malu. Tetun ne'ebé timoroan sira ko'alia ba malu hetan mudansa makaas, tanba influensia hosi lian Portugés. Nune'e, ikus mai mosu "Tetun Prasa" ka "Tetun Dili" ne'ebé oras-ne'e daudaun konsagra iha ita-nia konstituisaun RDTL hanesan lian ofisiál.

Iha sorin seluk, durante Portugál nia ukun, igreja katolíka mós dezenvolve Tetun-Kreda. Tetun-Kreda mak Tetun ne'ebé Igreja Katólika uza hodi hakerek dokumentus prinsipais Igreja nian. Tetun-Kreda nia hun mak Tetun-Terik. Iha meadus tinan 1932, Igreja Katólika hahú uza lian Tetun hodi hanorin iha eskola, servisu fatin, repartisaun militár no fatin seluk tan.

Hafoin Indonézia nia okupasaun, governu Soeharto obriga timoroan tomak atu aprende no ko'alia de'it bahasa Indonézia. Governu Indonézia bandu timoroan sira atu aprende no ko'alia lian Tetun no Portugés. Biar nune'e, Igreja Katólika no organizasaun rezisténsia nafatin uza lian Tetun no Portugés hodi komunika ba malu.

Liu-tiha Indonézia nia okupasaun, tama ba períodu indepedénsia, lian Tetun sai hanesan lian ofisiál ne'ebé konsagradu iha kontituisaun RDTL artigu 13. Iha tinan 2004, primeiru governu konstitusionál ne'ebé lidera hosi Dr. Mari Alkatiri hasai dekretu governu no 4/2004 hodi dekreta ortografria Instituto Nacional de Linguística (INL) nu'udar Tetun padraun. Ho nune'e, ministériu, instituisaun públika, ensinu aprendizajem no seluk tan utiliza Tetun INL hodi komunika ba malu. Esetu Igreja Katólika ho ensinu superior DIT mak sei uza ortografia Tetun tuir sira-nia versaun rasik.

Autór: Timor Ha'u Nia Rain