JURAMENTU RAAN NO BARLAKI

Wainhira tempu funu Manufahi remata (1912), reinu balu Governu kolonial portugés halakon tiha; reinu balu hatama/integra ba reinu seluk. Nune’e iha Timor, hahú tinan 1913 to’o tina 1941 la iha funu, ne’eduni liurai ka dato sira la halo tan juramentu hemu raan atu ba funu.

Maibé mosu moruk ka aliansa seluk ne’ebé hametin nafatin relasaun amizade iha liurai sira leet. Moruk hetan formatu seluk, naran barlaki (barlaque). Reinu ida hakarak halo paktu ho reinu seluk, sira tesi lia atu liiurai oan mane ba hola feto reinu seluk, hodi kaben ho liurai oan feto.

Iha ne’e, mosu kontestu foun: moruk halo la’ós ba funu ona, maibé atu habelar no hemetin relasaun familiar. Nune’e mós moruk la bazeia ona ba segredu, maibé, serimonia tesi lia hala’o iha públiku, katak, ema assisti, rona lia na’in sira dada lia iha ema barak nia oin. Dala ruma Lia-nain sira tesi la’ós iha loron ida ka rua nia laran, maibé, “tesi-lia” ne’e bele to’o semana ida ka rua.

Familiares ka parente hosi Liurai oan mane sai hanesan FETOSÁN; no familiares ka parente hosi parte liurai oan feto sai hanesan UMANE. Moruk ka aliansa la bazeia ona ba hemu raan. Iha ne’e ba oin, relasaun bazeia ba realidade foun: oin sa Fetosán iha kbiit atu bele lori liurai oan feto ba sira nia knua, no iha kapasidade atu selu tusan hosi parte Umane nian. Nune’e mós oinsá Umane sira iha kapasidade ka biit atu korresponde ba Fetosán nia ezijénsia.

Tuir paktu kazamentu no lisan timor nian, Fetosán sira tenki fó karau, kuda, bibi no surik. Umane sira entrega fahi, tais, morten, brinku ho korrenti no ulu-suku ne’ebé halo ho osan mean ka osan mutin.

Hametin tiha relasaun entre Fetosán-Umane, parte ida-idak sei iha obrigasaun atu partisipa wainhira ema harii uma lisan foun (ka uma lulik), partisipa iha serimónia hakoi-mate ka funerál, festa kazamentu nian, no serimónia seluk tan. Wainhira parente ruma hosi Fetosán mak mate, maluk sira hosi Umane lori foos, fahi no tais. Iha ne’ebá sira labele han na’an fahi. Nune’e mós wainhira membru ida hosi Umane mak mate, fetosán tenki lori karau ka bibi no surik. Iha tempu ne’e, sira labele han na’an bibi ka na’an karau.

Ohin loron iha lisan foun: liuliu hosi parte umane ne’ebé la izije ona kuda karau, maibé osan (dólar no Rupiah karik, juta ba juta;) ezije tua, tinto garafaun, botil tua-manas eh “aguardente”, no ezije kaixa serveja bara-barak. Iha sermónia halo uma-lisan, ka hakoi-mate, ka selu barlaki, dala barak, mane-foun sira mak terus liu, tanba Umane ezije buat barak, to’o man-foun sira dada iss ladiak. Maibé, pasiensia de’it, tan ba tuir sira, ne’e lisan timor nian.

Iha mós problema pastorál seluk, mak ema dada ka adia loron kazamentu, tan de’it motivu, dehan barlaki seidauk selu.

Autór: Dom Carlos Filipe Ximenes Belo SDB,

Laureadu Premiu Novel da Paz, 1996